[阿囡小一上學記] (十四) 視藝科參觀之「動物大觀園」

學校既視藝科被稱為綜藝坊,功課政策同學校本身一樣自由,同學一個學期內做四份題材不限既作品就可以了,例如畫四幅畫咁。

呢個看似簡單既要求卻變成我地一個挑戰。阿囡畫畫一向有如抽象大師,人地畢加索,佢就不加思索。試過叫佢畫菜,佢畫左一個波然後同我講係菠菜。

好不容易捱過4份畫作,視藝科係聖誕假後要交多一份功課,今次係要同學參觀一個藝術展之後填一張工作紙。

一間好既學校一定有好家長,有好家長一定有高質既Whatsapp group。學校有家長知道呢份功課後,係group度share左一個城大攪既「動物大觀園」展,睇落相當有趣,於是就帶左阿囡去。

去到九龍塘又一城行十五分鐘左右就到達展覽館。一開門已經見到一缸類似蟹既野係門口,以為自己去錯地方。

再定神見到一系列畫卷,每張畫一隻動物。其中一張畫熊既睇落好似成隻狗咁,心諗阿囡原來古代啲人畫畫同你差唔多:

再仔細一睇原來係李時珍整既。下乜呢個人唔係整藥架咩,做乜攪埋動物呀?

正當個腦開始諗我係度睇緊乜野之時,一位姐姐走埋黎講:你睇緊既係李時珍係明朝記錄既動物畫象,李時珍本來係研究藥理,佢發現除左植物,動物都有藥用價值,所以做左呢份記錄。

哦…. 解答左一個疑問。

姐姐繼續解說:你可能覺得某啲動物畫得唔似,個原因係個畫家可能唔係對住隻動物畫,而係聽人既描述而畫。

哦…. 咪住,點解好似比佢讀左心咁既。

姐姐跟住介紹呢個展覽主要分5區,每一區用唔同角度去睇動物。例如呢區「博物百科」係講由古至今人類係點樣紀錄動物,另一區「傳說奇想」就會專講一啲由人類虛構既動物 (e.g. 孫悟空、Hello Kitty, etc) 。放眼一望果然見到場館有幾種顏色既地氈,睇黎係用黎分區。

場內有好多digital interaction玩,姐姐解釋係因為負責展覽既教授來自創意媒體學院,所以增加左好多互動元素。展覽內容更加係由幾個學系合作而成,希望真係可以令參觀者用多角度去欣賞同認識人同動物之間既關係。

阿囡好興奮咁週圍跑週圍襟;見佢衝埋去一個好大既地球度,側邊仲有一個好似遊戲機咁既野但我同阿囡都唔識用:

姐姐又再及時出現,解釋只要拎住呢部野對住個地球模型唔同位置 ,就會見到果個位置會出現既動物。

點一下會見到以前啲人點畫佢,再點多下出宜家既相。例如睇下呢隻獅子:

阿囡係呢個裝置玩到不亦樂乎,幾乎全部動物都襟左一次。

趁阿囡掛住玩我捉住呢位好似識讀心既姐姐傾計,初初以為佢係讀心理學,原來佢係讀文化系既學生。佢話呢個跨學系既合作,每個合作學系都有學生黎幫手;佢對展品既認識除左一啲係自己既學科知識,同時都係因為自己有再對展品既內容同背景溫習過一番。

講左成篇,我其實只係講左一區。場館每一區既主題都相當值得參觀而且仲幾多野玩,我仲睇得開心過阿囡。除左有趣既展品同埋佈局,更值得一讚既係「讀心姐姐」一路適時又詳盡既解說,令我地玩之餘真係拎到啲知識返屋企。

係度真心向大家推介呢個展覧,仲有大約三個星期,不妨帶埋小朋友去睇下:

  • 展覧:動物大觀園
  • 地點:香港九龍達之路香港城市大學劉鳴煒學術樓十八樓
  • 開放日期:2019年1月4日至1月20日(呢個已經係特別加長左既時間)
  • 開放時間:每日早上十時至晚上七時 (逢星期一休展)
  • 網址:https://www.cityu.edu.hk/2018-animal/visitorinfo

咦話時話…阿囡你張工作紙呢?

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!