Skip to content

[阿囡小一上學記] (二十九) 你學左啲咩呀?

做左小學生家長後,覺得自己總係會有幾句說話成日掛係口邊:「快啲啦」、「得未呀」同埋「話左你架啦」。

除左以上三大金句,過去十個月我講得最多既應該係:「你學左啲咩呀?」

係一年級最後一個星期回望:十個月以來,阿囡其實學左啲咩?

首先佢學左駁嘴。可能你會話你屋企果個一早就識,不過阿囡呢方面「發展遲緩」,宜家先開始牙尖嘴利。有好多家長或者朋友都同我講向好果邊諗:佢駁你嘴,即係代表佢會思考。事實上,佢自從勁駁嘴之後,覺得佢對唔同事情既意見多左。回想起早排係Facebook見到倪匡先生既一句說話:「人類進步全因唔聽上一代說話」,或許的確如此。

第二樣學左專注。雖然係屋企叫佢做功課執野有時都係發夢,但老婆係學校度見到阿囡參與活動既時候原來係勁集中,有時什至連我老婆係度佢都唔發覺,好似啲漫畫或者武俠小說講果種「忘我」既境界。

第三樣學左主動思考、有目標咁去完成一件事。學校考完試有份功課交左俾佢地,但唔駛一定要交,比著係我正路梗係唔做啦。但佢話想make teacher proud,所以要求話要做。雖然呢份又係親子野,最尾要媽媽幫手,但成個concept今次完全係佢自己諗,比起以前乜都係我地講俾佢聽點做進步好多。

總括黎講……雖然仲好幼嫩,但我同老婆都覺得「自學、自理、自省」既種子,終於開始發芽。

咁家長最關心既:佢宜家學左幾多中、英生字,識幾多年級既數學呀?我同老婆都無乜深究。大概無人會因為唔識串生字而被社會淘汰,亦唔會因為讀高幾年級數學而發左達;但無左動力既小朋友,將來肯定舉步為艱,更難言要得到快樂。

阿囡咁生性,咁做左一年小學公雞,我又學左咩?

話說阿囡一考完數學果晚同我講:

囡:「我今日考數學有條挑戰題我無答到呀。」

我:「點解呀?」

囡:「因為我check果陣知計錯左,想改但改唔切。」

我:「咁你記唔記得你覺得啱既答案係幾多?」

囡:「我原本寫35,但我再計係31。」

我:「ok啦!咁到時派卷個答案係31你咪啱囉!記得話我知係咪喎。」

囡:「但係我無寫上份卷,無左2分。」

我:「你識咪得囉;係有少少可惜,但你既目標係學識計數,唔係拎果2分。」

我覺得我學左果樣野,叫做「放下」。到底呢間學校係基督教定佛教架?

Be First to Comment

發表回覆

你的電郵地址並不會被公開。 必要欄位標記為 *