[阿囡小一上學記] (三十) 大結局之感謝祭

「阿囡小一上學記」終於都去到大結局啦! (嗚嗚嗚)

睇到大結局既你,仲記得walking dead之season 1 嗎? (無睇過即刻睇返丫唔該)

起初只係抱住一份想呻下既心情寫第一篇,無諗過結果會寫足三十回。可能家長要呻既野,永遠都唔會完。

黎到最後一篇,想係度多謝好多人。

首先想先多謝咁多位支持呢個故事既讀者。每一次睇到有家長留言話佢地有追呢個故事,我都會無比雀躍;遇到家長有共鳴、有回應既時侯更加會覺得I am not alone,有返好多動力。自己亦希望藉住呢個故事可以令對真道有興趣既家長,從另一個角度了解呢間學校。

多謝真道FS1既家長。呢一年係神聖偉大既Whatsapp Group度承蒙大家照顧得到好多有用既資訊 (例如呢個)。當然仲要多謝部分家長間唔中幫我係個group度宣傳下我寫既野,而且無拆穿我既身份(真道既家長真係好敏銳…) 。

多謝阿囡呢一班既家長們!每一次睇到大家係個group度互相幫助、鼓勵、提醒什至只係互呻或者講下笑,都會感到好好彩入左呢間學校!覺得你地好勁之餘,亦好驕傲成為你地既一份子。雖然無開阿囡係邊班……希望你地會收到啦!來年重新編班大家可能各散東西,係度祝你地既小朋友來年校園生活愉快!

多謝所有老師過去一個學年對阿囡既教導同照顧,我地一班家長知道係絕對唔容易。要每年好似輪迴一樣咁睇見啲小朋友成日發夢遊魂真係會發癲。多謝你地既用心同耐性,亦希望你地有感覺到呢一班小學雞係你地教導下短短一年間既進步!至少我可以係度confirm俾咁多位老師知……佢地係批判思考與即時回饋 (簡稱駁嘴)方面係進步神速。

特別感謝阿囡既班主任,好幸運係阿囡第一年小學遇到你!知道你用左好多種唔同既方法去幫助(或炮製)呢班莘莘學子;每次出黎玩見到佢成班同學一齊時既果種「萬馬奔驣」既場面,就更加覺得你好犀利!多謝你過去一年引導阿囡、比好多機會阿囡去試、去擔當,增加左阿囡既責任感同自信心。每次又好耐心咁俾我同老婆更了解阿囡係學校既情況,盡心處理我地既問題同埋訴求(… 即係攪掂我地啲投訴…) 。明白除左教學、仲要湊埋我地呢班小學公雞母雞真係好辛苦!希望阿囡會成為一個令你引以為傲既學生!

最後,多謝阿囡。無野比睇住你一日一日成長同進步更令我同媽媽滿足。我同媽媽希望你可以抓緊你既熱情,係呢個較自由既學習環境下盡情發揮,延續自學、自理、自省既精神。

係度預祝9月份升小既小朋友同家長們,黎緊新學年會有一個精彩愉快、屬於你地既小一上學記。

呢個故事有無續集?宜家興彩蛋,咁睇住彩蛋先……

———————————————————

我:「你想唔想佢黎呀?」

囡:「想呀!」

我:「咁你覺得…..佢機會大唔大呢?」

囡:「好難估…如果佢到時又唔聽話攪攪震就無啦。」

我:「咁又啱……唉……」

(待續)

8 Comments

  1. 你真係好有心機,而且寫得好好!
    令到我呢個乜都唔識但又要面對升小難題既家長知道好多野!
    我都好鍾意真道,可惜我囡囡連2nd in既機會都無……唉。

    • 多謝你既支持Cathy!希望你已獲得心儀學校學位啦!
      9月囡囡返學開開心心!

  2. 多謝好校爸無私既分享。起初呀囡堅持揀真道, 我都未收集太多學校資訊, 除左學校Website上既info。係度我可以知道更多實際既情況, 比我有定心理準備點樣迎接呀囡既fs1。萬分既感激!!

    • 多謝你既支持同埋歡迎加入真道大家庭呀!希望囡囡會同我個囡一樣咁鐘意返學!

  3. 一路睇一路起雞皮,令我好感動.,..
    好多謝你無私的分享,真係寫得繪影繪聲!
    期待我們(公雞母雞)與小學雞一起在真道愉快成長!

    祝你囡囡繼續享受真道熱情!
    祝”佢”成功過關!
    祝你繼續無比雀躍!

    • 多謝你一路既支持呀白賴仁!祝你小朋友黎緊都一樣會享受校園生活,有機會學校見!

  4. 好校巴,我剛收到真道offer, 但校車已full, 想問可否幫忙問到該校的街車資料,急。
    因要回覆學校,謝謝

    • Daisy唔好意思幫唔到你,之前好忙無睇返個blog啲留言。最終有無take到真道offer?

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!