以前喺香港，從來無諗過放超過兩個星期既假。一來本身唔夠假，二來係自己有一種「公司點會俾你放咁耐呀」既奴隸式自我抑壓。
但黎到加拿大之後，如果想返亞洲探下親友，無理由請一兩個星期咁少，啱啱Jet Lag完就走㗎。
趁小朋友spring break，我放下香港果個無形既放假心理枷鎖，鐵了心要一家大細黎個一個月既亞洲之旅。
我諗咗好耐點樣同學校同老細請一個月假。老師會唔會勸我唔好去，擔心小朋友跟唔上呢？老細會唔會叫我唔好去，擔心啲野做唔切呢？
但我好快就知道係我諗多咗。
老婆同老師提出請假既申請，老師竟然以未出發先興奮既語氣問：去邊度玩呀？
原來學生喺呢度請假去旅行係家常便飯。兩姐弟話其實佢好多同學都會請假去玩，返黎仲要同老師一齊睇相開心些牙(share)。
我地問老師會唔會有啲materials可以俾阿囡呢一個月自己跟下，老師話：「唔駛喇。去旅行應該集中去遊歷，旅行能夠學到既野多著呢！」
幫小朋友請完假，輪到我同公司請假。
我既情況比較尷尬，因為我啱啱轉工，跟合約理論上係唔可以咁早放假，更不用說請成個月了。不過因為我喺見工時已經同公司交代過呢個打算，所以同老細仲有HR商量之後，公司亦爽快批咗我呢一個月既假期。
臨出發，我忽然奴隸症發作，問上司駛唔駛拎埋部電腦以防萬一。結果上司話：「唔駛喇。去玩帶野去做？你無野下話？」
結果最後我得到既安排係：假期期間我公司個account會被人lock咗。放假仲想做野？放一萬個心，公司係唔會俾你得逞既。
今次亞洲之行第一站係日本。
講起去日本，同事們都比我更興奮。原來日本係呢度好多同事bucket list上其一必去既地方。淨係講緊3月，我已經有4個同部門同事去日本，好多都係第一次去。
「日本一定唔會令你地失望既」。我喺心入面默唸著。
呢個「你地」，除咗包括我呢班即將去日本玩既同事，仲有我兩個去過幾次日本但已經印象好糢糊既仔女。
就係咁，一家四口帶住前所未有既放長假心情，重返呢個唔駛回鄉証都返到既鄉下 – 日本。
