雖然今次返香港自己有少少旅客身份，不過我其實並冇特別想要去啲咩地方。除咗最重要見下親朋好友，我同老婆都只係想懷緬一下以前同小朋友成日去既地方。呢個亦係我地選擇住返喺以前屋企附近既原因。
將軍澳基本上並沒有翻天覆地既改變。當然，有啲鋪頭執咗，但亦有好多間舊鋪依然屹立不倒。
我地沿住將軍澳運動場漫步去坑口。儘管喺我眼中呢條以前日日都行既路幾乎沒有變化，但同行既弟弟對呢度既記憶卻不怎鮮明。
我地去到弟弟以前讀果間幼稚園門口，咁啱見到以前教佢既老師，於是叫佢同老師合照。弟弟離開既時候，一臉天真無邪地問：「頭先果兩個邊個黎㗎？」
弟弟移民果時係K3。雖然相隔只係幾年，但佢當時咁細，其實無論係人、事或地，好多野都唔會記得。雖然有少少唔想承認，但我諗要咁細個跟我地移民既下一代好似我地大人咁對香港產生感情同惦念，真係談何容易。畢竟佢地對香港既記憶已經如此模糊。
到咗坑口，我特登去返以前每星期都會自己去me time既坑口街巿food court。我以前曾經寫過，好掛住其中一間叫做「亞哥滷水」賣滷味既鋪頭。今次返黎，發現佢已經無做了。
我最終都係來不及同佢講：「你滷味……整得好好食」。
帶住少少失望，我行返去將軍澳運動場。
我好懷念以前幾時都可以行落街跑步既方便。我由於肚腩大但四肢又不強壯，跑街個膝頭覺得痛，所以比較鐘意去運動場跑步。名符其實賴地硬。
望住喺度努力練跑既年青人，我喺度諗：「如果我無走到，我係咪就會成日落黎跑步？我會唔會呢個鐘數（下午3點幾）喺度同呢班年青人一齊跑緊呢？」
不過我諗如果我真係無走，某一日我喺呢度跑步果陣，我更大可能會問自己：「如果我有去加拿大，會唔會都好似宜家咁出去跑步呢？」
今日既我，總算可以回答呢個問題：「傻豬黎既。咁凍，我梗係懶無出去啦」。
