弟弟今日喺學校同個同學仔一齊玩部自動酒精搓手液機：伸隻手埋去等部機出酒精搓手液果下即刻縮手，結果整到成地都係。
老師經過見到，走埋去問兩個小朋友有無份。
起初兩個小朋友都一口否認，但老師第二次問既時候，弟弟坦白承認咗係佢整既。
老師第一時間讚賞弟弟勇於承認過錯，然後叫佢兩個小朋友同校工一齊清理返個地下就完事。
其實小朋友 (或者大人) 點解要講大話？
因為佢地 (或我地) 覺得無法承受講真話既後果。
如果你話我知整污糟個地下既後果以後無得打邊爐，咁我死都唔會講真話 – 呢啲咪寧死不屈囉 😅。
老師第一時間唔係氣沖沖走埋去鏟弟弟點解整污糟個地下，而係讚弟弟講真話，咁弟弟就會明白其實講真話並不可怕，下次老師再問佢野既時候佢可以放心將真相講出黎。
至於做錯事既結果 – 將做錯的事補救就好了。
我諗罸企罸抄什麼的其實無乜效，因為小朋友無法將「抄一百次我以後不敢了」同整污糟個地下既後果掛勾 – 反正佢抄一千次，個地下都仲係污糟。
罸佢企罸佢抄，不過係俾機會佢恨你。因為佢之所以要企要抄，係因為你。
但叫佢將做錯既事補救，俾咗機會佢反省。因為佢之所以無得去玩要抺地，係因為佢自己。
簡單一件事，覺得自己喺老師身上又上了一課。
