最近因為一陣《男兒當入樽》熱，我翻睇咗作者井上雄彥既另一套漫畫《REAL》。
《REAL》同《男兒當入樽》同樣都係以籃球為題材既故事：《男兒當入樽》講既係高校籃球，《REAL》講既係輪椅籃球。
《男兒當入樽》令最我難忘既，當然係果種熱血、永不言敗既鬥志；但《REAL》令我感受最深既，卻係現實中「做唔返自己」既無奈。
《REAL》既三位主角因為各種理由無法做返以前既自己：野宮原本熱愛籃球，但因意外導致他人半身不遂繼而輟學，從此失去人生方向；戶川原本有望成為日本高校第一短跑手，卻因為遺傳病而被迫截肢；高橋原本係萬人迷籃球隊隊長，喺學校要風得風要雨得雨，但因一次交通意外變成半身不遂。
三人當中，高橋既故事對我黎講最震撼。佢每日既生活基本上就係重覆地去確認自己同以前既差距：以前能跑能跳既佢，宜家想自己去廁所都去不了；物理治療師帶佢去室內體育館做復康運動，卻令佢意外地發現以前一跳起就可以抓住既籃框，如今竟然變得無限遙遠。
籃球架還是以前一樣高度，但佢已經唔再係以前果個佢。
高橋一直無法接受自己餘生只能坐係輪椅上，於是喺佢既世界入面，任何事都變得不可能，然後佢只能選擇不斷沉淪。
最終令高橋脫離泥沼既，係有一日佢喺體育館睇到一場輪椅籃球賽。一瞬間…自己以後都企唔返起身呢個事實、自小想成為籃球員既理想，係高橋腦內重疊成一個新既目標。輪椅籃球，成為高橋重拾生趣既救贖。
高橋原本自覺已經「玩完」既人生，終於再次出現一點意義。
移民其中一個令人struggle既地方，就係做唔返以前既自己：搵唔返同聲同氣既夥伴、食唔返以前成日食到既美食、搵唔返以前做開既行業或職位、搵唔到以前咁多收入、貫徹唔到以前既夢想….
《REAL》呢個故事俾我既啟發，就係儘管現實殘酷，只有接受現在既自己，先會找到下一個目標。
過去既路、曾經既理想或者已經無法實現，但新既機會可能以一個截然不同既新方式出現 – 好似高橋用輪椅籃球去延續自己既意志一樣。
寫到呢度，Youtube既playlist播起陳奕迅既舊歌「今日」：
「抬頭吧 黑暗過會是晨曦 懷著樂觀總有轉機」。
