[姐弟海外升學記] (三十四) 給要移民,又未ready移民的你

相對好多移民加拿大既人,我既移民之路簡單得多:我做咗既野只係喺十幾年前令一個有加拿大國籍既女同事鐘意我。

我無考究過現實中到底搵個有加籍既伴侶還是stream A stream B既機率高啲,畢竟我識我老婆果陣,從無想過要移民。

我甚至一直對於我擁有移民呢個選擇感到壓力甚至恐𢣷。因為如果我老婆話想返黎加拿大,唔想移民既我已不能用「好難攪㗎移民,不如唔好去喇」做藉口。

第一次老婆提起移民係差不多十年前,大囡出世既時候。當時我同老婆既工作都十分穩定,社會亦無近兩年出現既移民風氣。所以我俾咗老婆一個女朋友催男朋友結婚時會用既答案:「我未ready」。

兩年後弟弟出埋世,我地既生活依然一如往常。家姐升小了,不過好幸運家姐考入咗一間好好既直資學校,令「小朋友讀書」呢個移民既主要理由,短暫地從「為什麼要移民」既理由上剔除。

但無時無刻,我心入面都始終帶住一份恐懼,好怕我老婆再提起移民呢個題目既時候,係問我「你幾時ready」。

不過世界既轉變,從不等待你ready與否。

二零一九年,香港既改變不用多說。弟弟就快升小,儘管自己寫咗成個blog講點考小學,我亦完全無信心坐唔定既弟弟可以適應香港既小學生活。而唔知好彩定唔好彩地,我多年穩定既工作亦出現好大改變,令我既comfort zone終於不再comfortable。

當移民呢個選擇再出現喺我面前,我決定就算唔ready都要豁出去一次。

移民加拿大之後,我發現移民其實同好多事一樣,無所謂ready唔ready,亦無得等到你完全ready先去做。

唔駛講咁遠,就講做人父母好了:大家回想自己第一次做父母果一刻,你有覺得自己已經很ready嗎?

大囡出世前,我睇咗好多育兒書,上過唔少育嬰班去get ready。但當阿囡出咗世之後,總係會出現你未ready 過既情形:上堂學換片果個BB公仔,唔會好似阿囡咁生猛係咁郁㗎喎。

無人可以100% ready做一件事,特別係如果果件事係你既第一次。就算你生第二個小朋友,你都一樣可以唔ready,因為你只係「第一次」有兩個小朋友。

所以對想移民又覺得自己唔ready既人,我想講:移民同結婚、生仔、轉工、升職一樣,你最需要既其實不是readiness,係willingness。

離開香港或許並不困難,你買張機票就可以了。但離開以後,就算你有萬全準備,若你每日帶住一百個不情願,你會好難留守並融入一個新既地方。

就算小朋友準備咗native英語;若佢地唔願意學習同埋堆,佢地喺新環境唔會享受返學,更唔會結識到新朋友。

就算老婆曾經喺加拿大生活過;若佢唔願意所謂放下身段,佢唔會喺新環境搵到一份理想既part time工作。

就算…..我咁靚仔又有頭髮,若我當年唔願意問果個加拿大回流既女同事一句「食咗飯未」,今日既我唔會組織到家庭、更不會身處加拿大。

但只要你願意,你就有機會享受到新生活可愛一面。

喺度祝福每一個已移民或將準備移民既香港人,喺轉換心情面對種種困難既同時,可以慢慢享受新生活帶來既甘甜。

香港人加油!

2 Comments

  1. 作為一個長期 CD-Rom 的支持者,情不自禁地要留言。寫得好好。

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!