有朋友問咗我一個問題：走咗咁耐，有無掛住香港？
人就肯定會掛住了，不過除咗人，掛住既野仲有好多。
其中一樣係出街食野。
我以前住將軍澳既。每星期我都會帶阿囡去坑口學野，等佢果一個鐘無野做，好多時就會走去食個tea打發時間。坑口既街巿有一個叫做Food Lane既熟食巿場，我通常會走過去果度掃街：拮下魚蛋、食個雞蛋仔或者蛋撻、飲杯珍珠奶茶，有時lunch唔夠飽什至會去食碗牛腩河，然後沿住個商場漫無目的行一個鐘，當係一種me time。
呢個food court我幫襯得最多既，係一間叫做「亞哥滷水」賣滷味既鋪頭。我會買一個28蚊(好似)既套餐，入面有三樣野：生腸、雞腎同墨魚，再加上甜醬同埋芥末醬，成件事就fit唒。食過第一次之後，真係好想同老闆講：「你滷味……整得好好食」。自此之後，每個星期都會心思思再去食，儘管知道呢幾樣野都唔係對身體有乜益處。
曾經有個美國黎既同事同我傾計，問我點解啲人可以擺果啲好似螢光色既墨魚落口。我笑而不語，因為爽口同彈牙呢類感覺，我覺得我就算英文幾好都唔會令到佢明白。
唔單止係我，其實老婆亦一樣掛住香港既美食。
老婆最掛住既應該係香港既各種米線。曾經有一段時間，落街食米線幾乎係我地一家每個星期日既指定活動。當時弟弟仲好細，但我地都照舊帶埋佢出街，一邊餵佢一邊食；旁人可能會覺得我地好似食到好忙碌咁，但我地卻樂在其中。
可能有好多移咗民既人，特別係移咗好耐既朋友會覺得：其實唔駛掛住呀，呢度好多野都有得食呀。而且更有好多人會覺得自己整都整到呀，黎到加拿大有時間，其實好多野都可以自己做。
我明白 。事實上的確如此，老婆同埋住喺呢邊既屋企人真係經常發揮創意同小宇宙，屋企廚房又大，的確好多時喺香港出街食既野，喺屋企都整到。
不過我諗令我同老婆懷念既，其實並非只有食物本身。
大家有無睇過「志明與春嬌」？戲入面余文樂鐘意食7-11既肉醬意粉，佢女朋友楊千嬅唔明白呢啲咁既野有乜好食，余文樂既答案係：「因為佢鐘意個回憶」。
我懷念既回憶，可能係果種可以隨時隨地隨意覓食既方便，又或者係當時就算任意外出消費買野食，身體上同金錢上都依然可以afford既自己。
可能我同戲中既余文樂一樣 – 唔係一樣靚仔…而係都擁有一種不成熟吧。
如果呢度有將軍澳既讀者，會間唔時去坑口度幫襯買下野，又咁啱去開呢間「亞哥滷水」同老闆稔熟的話，你可以同佢講：
「遠在加拿大零下幾十度既地方，依然會有人懷念你整果條生腸」。
Photo credits: https://www.flickr.com/photos/webel/
由你一樣, 由將軍澳來到Calgary.
初來報到, 準備考車. 雖然來咗冇幾耐, 但你既回憶, 已經成為咗我既懷念…
歡迎黎到Calgary同埋祝你考車成功！
對…咁你有無幫襯過我講果間滷味？