Calgary既夏天都可以好熱。雖然溫度無香港咁高亦無香港咁「痴立立」，不過因為無乜高樓大廈遮住個太陽，走在街上，絕對會令人聯想起經典廣告對白：「邊度都有陽光」。
第一年黎Calgary既時候住喺人地屋企basement，並無覺得呢度特別熱。但當搬咗去新屋，因為無裝冷氣、又無basement可瞓 (basement無裝修所以唔可以住人)，終於發現呢度夏天無冷氣真係熱到瞓都瞓唔到。
我諗冷氣或者同母愛有一個共通點： 你有果時唔覺，但無果時……真係好覺。
還好同母愛唔同，冷氣機係可以用錢買既。
我同老婆喺裝唔裝冷氣機呢個decision上都掙扎咗一陣。講真全年真係要開冷氣既日子可能只有兩個星期，駛一筆咁既錢好似唔係好化算。但當你一家大細熱咗幾晚瞓唔著，然後果張裝冷氣機既傳單一再喺你面前出現，你就會用sales口吻同自己講：「其實除開X年都係XX蚊，唔係好貴啫。」
儘管公司有work from home policy，踏入夏天，公司多咗好多住得近既年輕同事返工。因為好似夏天喺香港啲商場流連既伯伯一樣，返工可以免費涼冷氣，電費都慳返。
我發現公司既冷氣同我以前喺香港返工果時既冷氣一樣強勁。因為連果啲平時零下四十幾度下連眉頭都不皺一下既同事，喺公司坐坐下都竟然會同我講：「嘩，呢度好凍呀」。
公司宜家有一個都幾有趣既現象：冬天返到公司，同事一除大褸，入面通常就只有一件短袖衫；相反到咗夏天，同事原本只係著住一件短袖衫返黎，但一入office就要著返件褸。
如果有人再問我Calgary幾時係最凍，我應該會答佢：「同香港一樣，夏天喺office果時」。
