[姐弟海外升學記] (八十二) 回加

終於要返加拿大了。我地同上次離港一樣叫啲親友唔好黎送機，因為我好怕面對離愁別緒既場面。

上次離港時正值COVID，因為驚染疫精神繃緊，自己又帶住好多不確定前往一個陌生既地方，亦唔知何年何月會再返黎同親友見面，所以心情份外沉重。

今次離港，加拿大已經不再係一個陌生既目的地。親友亦知道我地已經算係settle咗無需擔心，甚至可以喺不久既將來黎加拿大探我地。「後會有期」變得如此實在，而唔再好似「得閒再飲茶」咁虛無縹緲。

---

回顧今次既旅程有好多令我難忘既片段：弟弟喺日本衝出閘攬住好耐都無見（真人）既嫲嫲、第一次去呢幾年來只係喺video call度見到既嫲嫲新居、喺街上碰到多年未見既親友、同每一位久未見面既親友擁抱……

我仲有好多食叉燒既回憶。唔係打排球果啲「食叉燒」，真係食果啲叉燒。因為朋友都覺得加拿大啲叉燒無咁好食，所以個個都請我食叉燒。

最難忘係一家大細日夕相對咗成個月。其實無論係喺香港定加拿大，大家平時都要返工返學，好難得大家係一個月乜都唔做淨係一齊去遊歷。每日全程對住當然有勞氣既時候，不過能夠同佢地去重新感受日本同香港實在太有趣了。

我諗唯一既遺憾係因為時間緊迫，無機會見哂每一位想見既人吧。

同朋友相聚，席間或多或少有討論移民呢個話題。佢地當中有準備出發的、有了解後放棄的、有回流的，亦有已於海外安居樂業的。

聽咗唔同人既故事，我再一次體會到移民只係一個選擇。同我當年寫搵學校其實沒有兩樣：沒有最好，也沒有對錯，只有適不適合。

我喺度祝福每一個留港既家庭朋友安好，亦希望決定或已移民既一切順利。

---

飛機喺跑道上衝刺，然後好似跳遠運動員咁一躍而起離開跑道。

我再望一次窗外既景色，心情同上一次離開截然不同。比起忐忑，多了憧憬。因為返到加拿大，又有新既章節等我地去揭曉。

「後會有期！」

我向漸漸遠去既香港默唸著。

#夕陽無限好

#加拿大香港人