臨近學期尾聲去接弟弟放學。弟弟比平時遲出黎，而且總係喜沖沖地衝埋我度既佢，今日好似漏緊氣既汽球咁慢慢遊移過黎。
「今日點呀弟弟？」我一如往常咁問弟弟。
「今日我地全班都agree係全年最唔開心既一日呀。」弟弟少有地展露出唔開心既表情。
有乜野可以攪到成班一齊唔開心？因為有同學要離開？但無理由成班都唔開心㗎。
哦…….
「係咪有老師會離開學校呀？」我試探式地問。
弟弟點一點頭：「你估下係邊個老師？」
「係咪homeroom teacher？」我幾乎95%肯定。
弟弟垂頭喪氣地回答：「係呀……我地個個都好失望。」
我喺度叫弟弟既homeroom teacher做Ms Karen吧。如果你睇咗呢個blog好耐，我曾經喺《移民路上的人》度有寫過佢（未睇過既可以睇返）。
Ms Karen已經教咗弟弟兩年了。呢個望落去有少少惡既老師，其實一啲都唔惡，仲對弟弟相當有耐心。因為Ms Karen好了解弟弟既數學天份，所以佢會特別安排啲難啲既數學題俾弟弟做，又安排佢同志趣、能力相近既朋友仔一齊學習。
唔止發揮弟弟既才華，Ms Karen同時留意到弟弟需要改善既地方。弟弟不擅同人地溝通同埋性格比較內斂，於是Ms Karen又安排教佢點叫人invite佢一齊玩、點同人地say no、點話俾人知自己想點等等。宜家喺學校遇到有乜野唔開心既事，弟弟起碼會願意主動話俾Ms Karen知。
老婆喺弟弟間學校做咗兩年volunteer，對Ms Karen有更深刻既體會。
老婆話Ms Karen好有方法控制班學生。每次啲學生唔聽話，佢總係婉轉得黎又有威嚴地叫啲學生乖返。例如啲學生唔肯返埋位，佢唔會大聲鬧啲學生，但會話：「I am confused why some students aren’t sitting down after the bell already rang 5 minutes ago。」
有一次老師叫弟弟同幾個同學做咗個presentation教啲同學仔數學。班上既女同學先竊竊私語，然後大聲喊悶。Ms Karen即刻叫停，然後同全班解釋因為知道班上同學唔明白一啲數學既概念，弟弟佢地先會特登花時間去準備個slideshow幫佢地，所以同學們應該要留心，更應該尊重present緊既同學。
我覺得弟弟呢兩年都keep住認識到朋友仔、返學返得開心，更重要係感受到被認同、建立到自信，老師既心機功不可沒。
呢個blog一開始係寫搵學校，因為我同老婆都相信學校既理念對小朋友影響深遠。不過睇住弟弟呢兩年，我地覺得一個好老師對小朋友既影響力更為直接同巨大。我地其實有打算為弟弟申請去其他學校，不過因為遇到一位好老師，我地最終選擇留弟弟喺宜家呢間學校。我記得當時Ms Karen知道我地既選擇後如釋重負、激動地同我地講：「我好開心可以繼續教弟弟，弟弟太有趣了。」
所以當我地知道Ms Karen要離開，我地既失望不比弟弟少。老婆喺學校做野果時，弟弟有個女同學話咗俾老婆知Ms Karen要離校既消息，結果老婆同呢個女同學一齊相擁而泣。
Ms Karen原來喺呢間學校已經教咗18年了。我相信其實最唔捨得既應該係佢本人吧。佢同老婆講佢其實一直都無諗過會離開，甚至已經準備好下年既編班安排。不過忽然有一個好近佢屋企既機會，同時可以令佢學會更多教學知識，所以佢決定接受呢個挑戰。
Ms Karen喺學校發俾家長既電郵度留咗一句我諗每一個移民既人都會認同既說話：「Change is hard, but it also helps us grow」。
Ms Karen臨別喺弟弟返學既工作簿上寫上：「I will miss doing math with you. You are an amazing kiddo」。我相信弟弟都一樣會好掛住同Ms Karen一齊做數學既時光。
希望Ms Karen喺新環境工作順利，當然更加希望弟弟會喺九月開學時遇上好似Ms Karen咁好既老師。
