返到香港，約咗兩個朋友飲茶。一坐低，朋友忽然問我：「喂，你好熱咩？」
我環顧四周，發現包括我兩個朋友在內，全場既人都著住件褸，只有我格格不入地著住件短袖Tee。
我一向都係寒底，長期手腳冰冷，十幾度我都要包到成隻糉咁。你可以想像我當年搬去Calgary有幾驚，因為如果零上十度我都要打底褲，零下幾十度我應該要著至少6-7條褲吧。而你諗下如果你急要去廁所….
事實上喺Calgary住咗幾年，每當見到啲外國人著短袖短褲而我仲著哂大褸，我就有啲氣餒，覺得自己呢種怕凍體質好難改變。無諗過今次返到香港，我先發現自己既身體喺不知不覺間變得無咁怕凍。
我諗習慣係一個過程。無一個掣係你一襟就由「唔適應」變成「適應」。原來俾啲時間，有一日你望返轉頭，或會發現你無啦啦已經跨過果條適應既界線。
不過，正正係因為咁，習慣咗加拿大寒冷天氣既兩姐弟，返到香港變咗完全攪唔掂香港既天氣。因為除咗溫度，另一個兩姐弟更適應唔到既，係濕度。
Calgary係一個好乾燥既城巿，就算夏天上到二、三十度，天氣都依然好乾爽。但大家都知將軍澳有幾「潮」，加上悶熱既天氣，攪到成身「黐笠笠」好唔舒服。
以前我地細個一話熱，啲長輩就會同你講「心靜自然涼」。我一直唔相信呢句說話，覺得佢有邏輯問題：我就係熱，個心先唔靜嘛。心靜係果，唔係因。所以我個人係比較相信「食雪糕自然涼」既。
好彩我地以前鐘意樓下果間糖水鋪仲有開，落去一人整個雪糕系列糖水消消暑就解決。食多咗而增加既脂肪，令我返到加拿大可以更耐寒。
呢啲咪一石二鳥囉。
