每日行返公司果條路，總係遇到一大堆鴨喺度悠閒地散步，好不寫意。每次見到呢個情景都會喺度諗：做鴨其實係咪好啲？
唔係做果啲鴨。I mean…literally游水果啲鴨。
我諗近來既工作壓力令我有少少星期一症候群。想改變呢種失衡，鴨怕且就做唔成了，或者至少可以試下轉工。
我加拿大既第一份工都差不多做咗3年。雖然事業上沒有任何寸進，但至少感覺自己終於同其他人站在同一個求職起點上：我終於擁有加拿大工作經驗。
喺信心比當年更大既同時，我發現搵工卻並不比當年輕鬆。
首先呢度既就業巿場好似有啲放緩。特別係IT，幾間大IT公司好似Amazon都帶頭炒人，自己公司其實大半年前都炒過人一次。我諗自己如果唔係早幾年就黎咗，恐怕想搵第一份工入局都好難。
其次係工種。其實當初搵到宜家份工都幾不可思議了，想喺Calgary搵第二間要我既skill既公司都未必有。如果放眼成個加拿大，工作機會會多啲，但除非我搬省，否則只係可以搵啲remote既工，選擇就少好多。再者揀得呢啲remote工，變相即係同全加拿大既求職者一齊競爭，難度相應提高。
再加上雖則喺度做咗3年，但職場上既人脈始終係少。以前喺香港想轉工，可能問下朋友都已經會有啲機會，但宜家無人介紹你、無人識你，要靠自己就需要多啲時間同心機。
我每星期寄幾封求職信，斷斷續續咁寄咗幾個月，絕大部分一啲回音都冇。有回音既都只係好有禮貌咁同你講sorry，we have already hired someone。
我有少少返返去當年SARS畢業出黎搵工果種感覺。我覺得自己好似喺條隧道度行緊，你知道入得條遂道，終究會出返去。個問題係你當初諗住只需要5分鐘，但你架車已經行咗10個鐘了，你都未見到前面出口既光。
你開始懷疑：其實….呢個隧道係咪無出口㗎？
踏入十二月了。感覺巿面一片靜寂，空缺亦慢慢減少。
一心諗住：好吧…先放一下大假，出年先再衝吧。點知喺呢個時候，忽然收到一間公司既email。
「Thanks for your interest in the xxxxx position at xxxxxx. We’d like to move forward and invite you to meet with us and begin the interview process.」
我好記得呢間公司，因為我過去幾個月已經apply過佢幾份唔同既工，次次都無回音。而且佢張appliation form啲問題多到令我幾度懷疑自己係求緊職定求緊偶。
3年前既呢個時候，我宜家份工間公司搵咗我去見工。
3年後既今日，我終於再獲得一個interview既機會。
睇過一本漫畫，主角有一句說話令我印象深刻：「自己不去行動，情況就不會改變。但只要行動，就一定會帶來改變」。
唔知呢個因行動帶來既契機，會唔會帶來改變呢？
