我覺得教小朋友要有爭勝既鬥志係一件好難掌握既事。
首先我唔想小朋友好在意贏輸得失，變成好勝、唔輸得。特別係喺加拿大呢度成長，大環境係鼓勵參與，大家並唔係好似香港咁計較成績、咁有競爭意識。
但我更加唔想小朋友凡事輸咗都無所謂。因為我覺得一個人想贏，先會有動力進步。
好似出名不服輸既籃球之神Michael Jordan咁。
話說當年佢代表美國參加92年奧運，同啲隊友集訓果時一齊打乒乓波消遣。佢起初同打籃球一樣戰無不勝，但最終輸咗俾一個隊友。於是，佢靜雞雞訂咗張乒乓波枱去自己酒店房苦練三日後重賽，結果壓倒性地成功復仇。
黎明話「要贏人先要贏自己」。我諗個前題係你要好似黎明或者Michael Jordan咁，唔可以太hea。
阿囡每星期都上既拯溺班最近攪咗個游泳競技日，邀請所有同學報名。阿囡一聽到要比賽就有啲抗拒，不過老婆希望阿囡積極啲唔好成日摺埋，於是說服咗阿囡幫佢報名。
比賽喺屋企附近一個游泳館內進行。比賽總共有6個比賽項目，全部都同佢地平時既拯溺訓練有關：拖住個假人游水、障礙賽、拋救生索等等。
第一場比賽係拖住條水泡來回游50米。比賽一開始，見阿囡同其他人叮噹馬頭，但游到差不多一半，阿囡就慢慢拋離其他人，最終第一個返到終點。
我諗佢自己都有啲意外。
之後既幾場比賽，睇得出阿囡積極咗。例如第二場比賽要用個扣扣住個假人然後拖住游返去，當其他人仲慢慢喺度搵個扣，阿囡兩三下就扣好，仲爽手過佢朝早扣好自己件衫。
一場勝利，似乎增加咗佢爭勝既欲望。
結果阿囡之後參加既幾項比賽全部以第一名完成。黎到最後一個項目，亦係阿囡最不擅長既項目：鬥快拋條救生索俾個遇溺者。
阿囡好努力咁拋條救生索，不過第一次就拋得唔夠遠。阿囡快快手回收返條索再拋第二次，眼見佢既隊友快要攞到條救生索之際，裁判吹哨示意夠鐘。結果阿囡最後一項喺無法完成下結束。
運動會完結，我問阿囡有乜感想。
囡：「好開心可以贏到幾個比賽。不過有啲唔甘心完成唔哂全部項目。我爭少少就完成到最後一項喇！如果我同我partner快手啲就可以做得完啦。」
比起「勝利」為佢帶黎既自信，我反而更希望呢種因未能盡力而落敗所產生既「唔忿氣」，會成為佢以後更上一層樓既原動力。
我：「你今日做得好好。我終於從你雙眼睇到你爭勝既決心同鬥志。」
囡：「我戴住個泳鏡你都睇到我雙眼？」
我：「晤….你游完除咗果一下我睇到嘛。」
諗住講下啲鼓勵說話一時講大咗。
有個咁鬼logical 既囡真係麻煩。
