早排睇完同事介紹既《Only Murders in the Building》，先驚覺原來Disney＋仲有得睇韓劇《Moving》 (異能)。
我好奇問咗一家大細一個問題：「假如有個神仙突然標咗出黎，然後俾你揀一個超能力，你想要咩超能力？」
老婆話想要類似隨意門咁既能力，可以一瞬間就去到另一個地方。我諗住老婆一向都鐘意四處遊歷去下旅行所以先揀呢種能力，點知佢話：
「咁你攞漏咗野或者買漏野你咪可以即刻返去囉。」
估唔到老婆做咗媽媽之後，佢超能力既用途都會連隨師奶化。
家姐話想要mind reading既能力，因為用mind reading佢就可以時刻理解我同媽媽既諗法，不過我覺得其實無此必要。
你識face reading已經夠啦。
難道你阿媽塊面黑過隻鑊果時，你都仲要mind reading先知自己瀨野嗎？
弟弟好貪心，有幾個能力都想要。有少少選擇困難症既佢，唔知揀邊個好。
我：「一定只可以㨂一個。」
弟：「唔好啦。我全部都想要。」
我：「好吧。宜家神仙話你可以㨂一個能力試用一個月。你唔鐘意一個月後可以去Costco退返換過第二個。」
弟：「咁呀……好啦，咁我想要time travel既能力。」
弟弟果然已經成為一個加拿大人。反正可以去Costco退，怕咩揀錯啫？
我：「點解想可以time travel？」
弟：「咁我咪可以返返媽媽鬧我之前果下，等佢唔好鬧我囉。」
我諗如果你真係有呢種能力，你個下場都只係返返過去俾媽媽再鬧多次吧。
至於我，我其實想要invisible既能力。
畢竟…..invisible，不就是每個男人夢想既力量嗎？
不過見呢度人少少先講丫。
我最近發現我真係開始擁有invisible呢種異能，特別係喺屋企既時候。
因為我發覺叫親兩姐弟做任何野佢地都無乜反應無理我。
唔知我係已經識得透明，定係……有人當我透明？
