[姐弟海外升學記] (十四) 驗屋 (home inspection) part 2 – basement

上回講到Home inspector幫我地驗咗屋外、屋頂同埋個車房。雖則都叫做有唔少野要跟,不過都唔算係超大問題;我同老婆依然無減對呢間屋既鐘愛。Home inspector呢個時候同我地返返屋內,落basement睇睇。

之前睇既屋大部分basement都有裝修,好多野都收埋咗所以無乜留意。今次第一次睇一個咁raw既basement,先睇到basement原來有咁多「機關」:

水渠 (sewer)

Inspector先搵到我地條主渠 (main sewer) 。佢跟住拎咗一支好長、裝咗鏡頭既野,然後塞入去條渠度睇下有無塞。我唔知點解聯想到照腸鏡,佢一路塞支野,我一路覺得自己條腸跟住唔自在。

呢一個check渠exercise好重要,因為呢度啲屋附近都會有好多樹,有時會有啲樹根生生下會塞住咗條渠:

有少少草塞住

條渠塞咗咁啲污糟野就有機會倒流返入你basement,你就極之大鑊了。如果喺呢度你發現個位真係俾啲草塞咗,你就真係要搵通渠佬(人,唔係果支通渠野) 黎通通佢。

熱水器 (Hot Water Tank)

睇咗去水,跟住睇下用水。原來呢度啲屋係有成個水缸喺你屋企入面:

Inspector話我地個water tank好舊 – 差唔多用咗三十年。Inspector話一般啲water tank都係用8 – 10年,就算仲安全都應該唔係好efficient,所以都建議我地換喎。

另外,我地個water tank只有40 gallon,inspector 話兩個人就夠用;我地屋企多人啲,買個60 gallon會好啲。

暖氣爐 (Furnace)

喺Calgary冬天無furnance,等於你喺香港夏天無冷氣 – 你話係咪好緊要呢?

呢度講既所謂暖爐唔係好似我地喺香港果啲暖爐或者暖風機,而係一個控制全屋暖氣既system。幾乎每次去睇屋agent都會特別callout 到底間屋個furance新唔新淨。好彩今次inspector話我地個furnance都算新淨,終於有樣野係唔駛換既……


Inspector跟住仲繼續睇咗好多野:睇下個電箱、試下水掣電掣、開下各樣電器、試下煮食爐等等等等,喺度就唔寫唒出黎了。

攪咗幾個鐘,inspector終於睇完;我地過兩日後就收到一份差不多200頁既報告。

同時,Inspector亦將呢份報告所列出既finding全部upload咗上去一個要login既網站,再根據問題既嚴重程度分類,類似must have, good to have之類。我地login呢個網站後可以睇返所有要維修既事項,然後搵人quote下要幾多錢執。

拎住呢份報告,我地個agent會同對家agent討論點拆 – 一係就業主搵人整咗佢,一係就喺個屋價度扣返啲錢俾你去搵人整。

我地太鐘意間屋了……而且又覺得inspector搵到既問題都唔算係大問題,所以我地最後都無乜同業主再還價,諗住雙方各自負責一半既維修費用就算。

臨扑鎚既一刻,我同老婆都仲係有啲猶豫:一來又驚間屋舊可能有野驗屋果陣check唔到,同時又有少少覺得間屋貴,唔值呢個價錢。不過我覺得睇咗成幾十間屋先搵到間覺得啱心水,如果今日give up呢間屋,真係唔知幾時先遇得返。再者,睇咗咁多間屋講真都有啲膩,倒不如爽快了咗件心事。如果永遠都想等到「最好」出現先扑鎚,可能有少少唔太實際 – 因為呢個世界,永遠都總會有「更好」既出現。

抱住呢種又興奮又緊張又患得患失既心情,我地同業主簽咗買賣合約,正式擁有我地喺加拿大既第一間屋,踏進另一個移民既里程碑 – 如果移民喺好似Marvel啲戲咁分階段,我覺得我地宜家大概係去到phase 2吧: phase 1喺「落地」,phase 2喺「安居」。

咁phase 3係乜?我覺得喺開始融入呢度既社會吧。點融入?或者由搵一份工作開始……

(待續 )

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!