子華神曾經喺佢一個棟篤笑講過：「細個唔同女仔玩，大個咪俾女仔玩囉」。
我諗科技，大概亦是如此。
所以今日我俾弟弟試下用ChatGPT。
弟弟有一個問題，就係佢同人傾計果時，好多時會忽略成個對話既context。明明講緊今日lunch食乜野，佢會忽然間同你講天文或者數學。
我發現喺佢同ChatGPT傾計既時候，ChatGPT可以將佢呢個問題形象化。
我叫弟弟隨意問ChatGPT一個問題。弟弟選擇問ChatGPT: 「NBA 2020年常規賽排第四果隊係邊隊」，ChatGPT 一瞬間就比到答案。
我：「你試下再問佢What about 2021，睇下佢識唔識答你？」
弟弟輸入我既問題，ChatGPT照樣好快答咗2021年NBA常規賽排第四既係邊一隊。
我：「你睇到嗎？你唔需要成條問題重新問一次，因為ChatGPT好似我地人一樣，知道宜家同你傾緊咩話題。例如宜家既話題就係NBA排第四果隊係邊隊。」
弟弟點點頭，然後繼續樂此不疲地問ChatGPT問題。佢果然好快就同平時一樣忽然180度轉換咗個話題：「Calgary有幾多間Starbucks?」
ChatGPT照舊熟練地回答。然後我問弟弟：「如果你宜家再問佢What about 2019，你估佢會點答你？」
弟弟快手快腳地輸入完問題，ChatGPT同時如我所願地回答：Sorry, I don’t understand your question. Can you give me more information or context of your question?
弟：「點解既？佢頭先都識答。」
我：「因為你忽然間轉咗問佢一樣完全唔關事既野，咁NBA排第四果隊呢個話題就無咗了。所以佢咪唔明白你問緊乜野2019囉。記住平時無論係同個AI定係真人，你忽然間轉咗話題人地就會lost咗㗎喇。」
弟弟又再點頭，然後繼續沉醉喺佢既NBA問題入面。
我唔知道ChatGPT呢個技術會對後世有幾深遠影響，更唔知道佢喺不久既將來會唔會取代咗我。不過我好肯定有一樣野係我宜家已經無法戰勝佢:
當弟弟由2020年一路問到1978年，ChatGPT至少無好似我咁精神崩潰。
請問弟弟是gifted? 有小學資訊嗎？萬分感謝