我第一次見到雪，係喺日本既新瀉。我記得一行出車站就係漫天飄雪，將原本古色古香既街道薄薄地鋪上一層雪白色。
美，係我對雪既第一個印象。
之後每次去旅行見到雪，都有一種浪漫既感覺。我覺得如果「分手總要在雨天」，咁溝女拍拖結婚擺酒都應該要在落雪天。
但移民黎咗加拿大之後，雪呢一種咁浪漫既元素，慢慢變成日常生活中要處理既瑣事。
移民前成日聽人講話住加拿大要剷雪好煩。我不會否認，剷雪絕不是我喜歡既活動。特別係一場大雪後，見到果一堆20-30cm厚既雪，未剷，個人已經「剷前抑鬱」。
但同時我又必需澄清：真係好大雪到影響到你日常生活出入既日子，其實好少。感覺就類似喺香港遇上八號風球既密度。所以儘管有幾唔鐘意，喺加拿大經歷咗三個冬天，都叫做慢慢習慣。
比起剷雪，我宜家真正最害怕既，反而喺隔離屋果位伯伯幫我剷雪。
隔離屋住咗一位我諗年過八十既伯伯。佢身體都幾壯健，成日見佢又行山又踩單車。每一次落雪，我未起身又或者未得閒出去剷，佢就已經一支箭咁衝出去幫我地剷咗個sidewalk。有時一路開會，一路睇見佢喺條街度冒住雪咁幫我剷，陳奕迅果隻《於心有愧》就會喺腦內立即播放：「良……..心有愧…..」
有時難得佢出咗去我又得閒，咁我就會把握機會即刻幫佢剷返。結果呢種關係慢慢演變到好似啲中國人送禮一樣：佢今次幫我剷咗成個sidewalk，我下次就幫佢剷到去佢屋企門口，真係「剷剷相報何時了」。
細個成日聽人講「各家自掃門前雪」，估唔到喺加拿大竟然遇上「各家掃埋你門前雪」。呢一種鄰居間既守望，可能正正就係我所嚮往、喺零下四十度之下都不會冷卻既加拿大式人情味。
