以前喺香港，隔個星期就會一家大細去食下迴轉壽司。黎咗加拿大之後，間中去幫襯下日本餐廳，發現menu上除咗一般叫開既壽司，仲有一整個比壽司更多選擇既組別 – Roll (卷)。
我諗大家比較認識既Roll，應該係California Roll (加州卷)。根據我Google咗一陣既結果，加州卷既發源地原來唔係日本、更加唔係美國加州，而係加拿大。
加拿大CityTV當年訪問咗一位喺溫哥華既日本廚師東條英員，佢自稱係加州卷既發明者。東條解釋創作加州卷既原因，係因為當時北美洲既人對未煮熟既魚生唔係太接受，所以佢選擇用一啲煮熟既材料 (e.g. 蟹肉)去整壽司，希望可以吸引到多啲顧客嘗試呢種當時並未流行既菜式。
加州卷同其他各式各樣既Roll結果慢慢喺北美為人所接受，亦慢慢將壽司呢個傳統日本菜式發揚光大。
有人批評加州卷同其他所謂「鬼佬壽司」並非「正宗」既日本菜式。唔知幾時開始，大家喺食物上都有呢種「正唔正宗」既討論。我相信「pizza加唔加菠蘿」應該算得上係其中既經典。
好老實，自己喺香港果時都從來唔會食加州卷，因為就係有一種「都係唔日本野黎既」既感覺。黎咗加拿大之後，因為選擇少價錢又貴，去到日本餐廳開始食下呢啲Roll，令我既想法有少少改變。
例如我最近食過一個叫做Aburi Scallop Dragon既Roll，Roll上面喺一大舊炙燒帶子，飯入面包住紫菜、蟹柳、雞蛋同青瓜，我就覺得好啱我口味。小朋友唔食生野，但芒果炸蝦卷呢味聽落唔多日本菜既日本菜卻已經成為佢地既favourite之一。
其實正唔正宗，係咪真係咁緊要？
好似Harry Potter入面既妙麗：就算唔係所謂正宗 (pure-blood)，能夠將魔法揮灑自如，不就是偉大既魔法師嗎？
與其追求「正宗」，不如追求「正呀」。
畢竟呢個世界上，比壽司Roll、菠蘿Pizza更唔正宗既野仲有好多。
例如我啲港式英文。
當然……仲有阿囡啲鬼妹廣東話。
