咁就喺加拿大做咗兩年野了。
我好幸運到埗無耐就搵到一份工，而且可以做返本行，儘管人工同職級的確同以前有一段差距。
因為工作性質相近，兩年以來，喺工作內容上我算係無遇過太大挑戰。令我碰壁既反而係工作內容以外既事情。簡單如加拿大既假期：明明係假期我照返咗工，但明明要返工我又當放假。
另外，雖然能夠應付工作上既英語，但私底下同同事相處用到既日常英語卻將我考起。我好多時都唔識讀啲新同事既名，而且同事講既閒計或笑話亦有時會聽唔明。
我諗work from home喺帶俾我方便既同時亦減少咗我同本地人既接觸，某程度上令我融入既步伐變得更慢。隨著疫情退卻，希望今年增加返office既時間會令情況改善。
我記得兩年前我見呢份工既時候，老細問咗我一條問題：「你未來幾年有乜打算？」
當時初到貴境既我，只係七拼八湊一個答案：「我呢一刻只係想落地去攞啲經驗。我最期待既就係可以與有趣的人做有趣的事 (work with cool people on cool things)」。
宜家兩年過去了，經驗我又攞咗了，但我對老細當日既問題，依然未有一個好清晰既答案。
我覺得我呢一刻既career goal比較接近《警訊》入面既求職陷阱：最好職位唔高但人工極高，類似月入十萬蚊做文員果種。
我有時懷疑係因為移民後資歷倒退令我無咗發奮向上既動力？又抑或係我其實從來都沒有「向上爬」既慾望？
宜家既我最渴求既，可能只係一份認同。無論係老細、同事定係客戶，任何人既一句讚美或者鼓勵，至少可以令我感受到自己依然有力更上一層樓。
當然，除咗讚美之外，我亦唔介意公司用類似加人工或bonus既方式黎展現對我既認同既……😅
同老細catchup，老細帶笑問我：「兩年了，你依然覺得自己work with cool people on cool things嗎？」
無諗過原來當年勉強擠出既答案，老細依然記得。
我想同佢講：of course。零下三四十度返工做野，有乜辦法唔”cool”？
