要認真追溯呢條移民之路既起點，可能要返去二十年前。
我搵到人生第一份工 (唔計暑期工) 既時候，正值SARS喺香港爆發；當時香港既氣氛，同COVID初段既百業蕭條有啲相似。所以儘管呢份工只係得3個月合約，我都開心到瞓唔著。
老闆係一個金髮既澳洲人，六呎身高，身材魁梧；佢有一種不怒而威既台型同魅力，令我聯想到斯文版既地獄廚神Gordon Ramsay。
所以我決定叫佢做Gordon。
返咗工之後，我發現呢位咁有台型既老闆其實係一個冷面笑匠。
首先，佢係我認識既外國人當中，最鐘意叫自己做鬼佬既鬼佬。
記得我第一次寫咗個program俾佢睇，但唔知係咪太緊張，自己襟極個program都無反應。喺我滿頭大汗之際，Gordon施施然咁拎咗我隻滑鼠襟咗個一下，個program唔知點解即刻正常運作。
當時佢拍一拍我膊頭，然後用有少少得戚既語氣同我講：「It only works with a 鬼佬finger」。
另外，Gordon亦係我認識既外國人之中，最鐘意講廣東話、同埋係講得最好既一個。
有一次同事電話響，但因為佢戴住個headphone聽歌聽唔到，攪到個電話響咗好耐。Gordon聽到有啲唔耐煩，於是走埋去拎起同事部電話，字正腔圓地用廣東話同對方講：「無呢個人，你打錯」，然後狠狠地cut咗對方線。
我到今日都仲記得果位同事驚訝既表情，同埋我地成班喺度忍笑既情境。
Gordon係一個多才多藝既老闆，由設計到寫program樣樣精通，所以跟住佢真係學到好多工作上既知識。但Gordon對我同好多同事最大既影響，係佢一絲不苟既工作態度。
無論幾細微既細節，Gordon都力求完美。就算只係差一個pixel (象素，電腦螢幕最細既單位)，只要佢見到唔係100%準確，佢都唔會收貨。佢最鐘意就係放把間尺喺我地個monitor度，然後同我地講：「你睇下，呢度無對齊」。
喺Gordon既領導之下，公司既project越做越多，規模亦越來越大：公司由我加入時既八個人，慢慢發展到有幾十人。
不過喺Gordon正值事業高峰既時候，佢毅然決定要全家搬返去澳洲。最主要既原因，係因為佢覺得佢既小朋友喺澳洲成長會比喺香港好。
我當時覺得好可惜，同時喺度諗：如果我有一日好似Gordon咁，我又係咪可以「為咗小朋友」而放棄自己既事業呢？
不過只係做咗幾年野、距離事業成功仲好遠既我，並沒有呢條問題既答案。
喺Gordon一家人返咗去澳洲幾年之後，我結婚了。雖然已經有一段時間無同Gordon聯絡，不過我依然膽粗粗地邀請佢由澳洲飛返黎香港主持我既婚禮。點知佢一口答應。
喺婚禮上致辭時，Gordon分享佢心目中一段成功婚姻背後既秘訣。
「我覺得一段美滿婚姻有三個元素。
首先係快樂。
快樂唔係單單係指成日笑、又或者純粹having a good time。快樂係認識到原來自己對身邊既人係幾咁重要。
第二係健康。
無論你有幾出色，沒有健康、又沒有家人喺身邊陪伴既人，談不上係一個成功既人。
最後，係保持冒險精神 (stay adventurous)。
結咗婚之後，你地兩個多咗責任，但千祈唔好停止去繼續冒險、探索呢個世界。尤其係當你未有mortgage、又未有小朋友既時候。」
我當時好單純咁諗：結完婚，要去多幾次旅行先得。
我從來無諗過原來喺第二個國家生活，會係實現「保持冒險精神」既方式之一。
當然我更加無諗過，我同老婆會喺又有mortgage、又有小朋友既情況下，走去地球既另一端繼續冒險。
(待續)
