[阿囡小一上學記] (五) 係電子學習定係打機?

記得當日去優才2nd in既時候,老師問:你點睇電子學習?

我係唔抗拒電子學習既,大勢所趨嘛。正如唔會有人再問你:你點睇Smartphone呀?

諗深一層其實我地呢一代人都接受過電子教學 – 教育電視咪係囉。仲記得成日會有個小朋友用好作狀既語氣走出黎講:「我明啦!」

去到宜家乜都digital既年代,電子學習更加唔只係小朋友既學習工具;MOOC (Massive Open Online Course) – 大規模線上課程已經係成行成巿。透過MOOC,你可以按自己興趣、進度,任何時間登入網上平台學習同交功課,好多仲要係唔駛錢。當中比較出名既平台如edX或者Coursera,更加係同世界級既學府好似Harvard、Stanford、MIT聯辦緊網上課程添。

講返阿囡間學校。開學時學校比左一系列既平台比阿囡試玩,中、英、數都有,我估大部分學校可能都係用呢幾個平台吧?

同阿囡login左入去玩過發現通常有呢幾種feature:

養飼 / 育成系

其中一個好常見既feature就係比你養飼 / 育成一啲野 – 養貓養狗養精靈各適其適。同我地一樣,要養大佢地就要錢,要錢就要做野 – 不過係做練習題目。

阿囡有玩過一個學中文既平台要養一條「書蟲」;書蟲一開始就有間屋但家徒四壁,你可以用你做練習賺既錢黎幫佢添置返啲家具。例如阿囡就用佢玩左半個鐘賺既錢買左張床比佢訓覺。

書蟲仲間唔時會表示肚餓,你亦可以去駛錢買野比佢食。不過以阿囡做功課既速度怕且唔會太多機會比佢入到去賺錢,書蟲恐怕已經早登極樂……

競賽系

利用人類唔服輸既心理,競賽系將唔同既用家拉埋一齊比較等你唔甘心又要login多啲。

競賽方法有好多種,最簡單就列晒用家既分數出黎等大家比較;因為開學時呢啲平台都會邀請成間學校用,所以好多時你一login就見到同班或者同級同學既分數,燃起你心入面想打敗晒佢地既慾望。如果你想為學校甚至為港爭光,有啲平台會出埋學校或國家既分數添。

有一啲更成熟既平台直頭可以比你即時連線real time同人比賽;例如阿囡試過玩過一個學數學既電子平台,入到去可以即時同其他小朋友鬥快計數,玩落都幾刺激。

歌舞系

想小朋友邊睇邊學,歌舞元素梗係唔少得。宜家大部分學phonics或者普通話拼音既短片都一定係整隻洗腦歌比你跟住唱,仲有公仔出黎跳晒舞等你keep住返黎睇。阿仔啲phonics基本上就係咁由Youtube度學返黎,不得不承認呢個方法都達到一定程度既學習效果。

電子學習做到一樣我覺得相當了不起既事,就係令阿囡「自主學習」。宜家夜晚阿囡如果早做完功課,好多時佢都會問我可唔可以入去呢啲電子學習平台度玩一陣。寓學習於娛樂,何樂而不為?

當然,我相信好多人都會覺得玩多得會傷眼或者令小朋友沉迷打機。我唔反對,但呢個係我屋企唔係問題,因為「電檢署」 – 即係我老婆自佢兩個一出世就一向嚴密監控佢地既screen time。再者我地連iPad都無部,想沉迷?No way。

Leave a Reply

發佈留言必須填寫的電子郵件地址不會公開。 必填欄位標示為 *

想睇到最新內容?

歡迎讚好「好校爸」Facebook專頁!