記得大半年前，喺遊樂場撞到阿仔同學個爸爸，講起我黎咗Calgary兩年幾。
「So you cannot use the ‘I am new’ card anymore!」
雖然呢位爸爸係用講笑既語氣同我講呢句話，但我當時覺得好難為情。因為做咗兩年幾宅男既我，幾乎就同新黎既沒兩樣。
令呢個局面出現變化，係公司今年開始調整work from home既安排，「鼓勵」我地每星期返公司兩至三日。我因此慢慢回復闊別咗幾年既打工仔生活。
返公司既好處係令我多咗同人相處既機會，唔再只係喺屋企對住一大堆online meeting既人像icon。我由當初好似啲隱青重投社會時自覺socially awkward，到宜家起碼可以同同事除公事以外傾下閒計。
當然，返公司既唔好處，就係無work from home咁flexible，更麻煩係要花多咗時間外出。
公司位於downtown步行十五至二十分鐘左右既地方。我搭公共交通工具，每日返公司單程就要大約一個鐘。因為夏天天氣暖，我通常都會喺down town落車行返公司，每日來回步行呢四十分鐘算係稍為補償我缺乏既運動。
由downtown行返公司既路大致有兩條，一條係相對較短、喺大馬路旁既直路，另一條則係沿住河邊較長既彎路。
我以前都寫過我好鐘意沿住條河漫步。因為細個家住沙田，喺城門河畔跑步或者散步成為咗一種習慣。所以儘管河邊條彎路遠啲、路上又有一班鵝攪到成條路都係鵝屎，每朝返工既時候我都總係本能地向河邊進發。
同部門有一位來自非洲、黎咗Calgary大約兩年既女仔，聽到我返放工既路程，話返俾我知原來佢每日都係同我行同一既上班路線，仲約我不如放工一齊行返落downtown。
「你有無發覺條路好多鵝屎？你點解每日都會行呢條路？」我好奇問我呢個同事。
「係呀！好多屎！不過……你唔覺得過咗果堆鵝屎之後，個河景好靚，令你覺得行遠少少都值得嗎？」
過咗頭兩年既所謂蜜月期，踏入移民後既第三年，生活上既艱難變得更加實在，令我覺得我既移民之路好似呢條河邊彎路一樣，多咗好多「屎」。尤其是當知道自己適應得好慢，宜家都仲好new，我不期然覺得有啲壓力。
不過我倒係依舊相信若然走過地雷陣，前面總係有好既風景。當初令我踏上呢條「屎」路，不就是因為我想飽覽地雷陣後既風光嗎？
「明天會更好」- 一句可能係好老套，但卻係對移民既人黎講最真實、最有份量既祝福。
早排去完溫哥華玩要回程既時候，我同兩姐弟講：「好喇，下次再黎玩啦！我地要返Calgary喇」。
果一刻我忽然發現，三年過去，無論我係old還是new，Calgary係我目中，已經係我既屋企。
因為我係用返屋企果個「返」字。
