試想像自己係一舊凍肉。
喺雪櫃入面，感受零下十幾度既寒冷凍氣，然後慢慢變乾、變硬……
我摸下自己塊面，感覺就好似我雪櫃入面果舊豬扒一樣開始僵硬。
我當然唔係凍肉，雖然我同雪櫃入面舊豬扒一樣，有啲肥。我亦當然唔係走咗入個雪櫃。我只係企咗喺條街度等咗10分鐘巴士。
歡迎來到Calgary既冬天。
上星期先喺度寫Calgary既秋天，不足一星期，Calgary就迎來第一場初雪踏入冬天。
初雪下既Calgary氣溫大約徘徊喺零下十幾度之間，未算喺最凍既時候，但已經足夠令所有室外地方變成露天雪櫃。
我返工既意欲，跟隨溫度降至新低。當然，一向其實都無乜。
比起溫度既轉變，街上景色既改變亦不遑多讓。原本混合紅黃綠葉既彩色世界，忽然被初雪染成只有白色，好似睇睇下彩色電視忽然變咗睇黑白電視一樣。
黎咗幾年，記憶中Calgary既初雪都係大約十月尾前萬聖節就會黎。每次初雪只係落一兩日然後就停，好似個天宜家俾個落雪既「trailer」你睇咁 – 嗱，過兩個月我就日日落俾你睇㗎喇，執生啦。
寒冷既天氣由宜家開始，大概將會持續到明年4月。我以前都講過，我感覺唯一可以長過呢度冬季既季節，只有馬季。
記得自己上星期執葉既時候同自己講：「我情願鏟雪好過」。宜家零下十幾度拎住個雪鏟，口中吞吐因冷氣而產生既煙霧，感覺講出呢句說話既自己應該係有精神病。
Calgary巿政府規定要喺雪停後48小時內鏟走你屋外行人路既積雪。我比較傾向有時未落完就出去鏟，一來因為如果等佢落哂先鏟，雪量更大變得好重，推起黎仲辛苦；二來係因為當啲人行過踩實咗啲雪，啲雪就更難鏟走。
不過講真，我覺得Calgary冬天最難鏟既，唔係雪。
鏟小朋友起身難啲。
