5、6歲果時，自己有幻想過喺麥記開生日會。我好好奇：到底麥當勞叔叔同佢啲friend會唔會黎？漢堡神偷偷咗野應該坐緊監，唔知黎唔黎到呢？
弟弟黎咗加拿大之後，去過幾次同學仔攪既生日會。比起我細個淨係識幻想喺麥記慶祝，宜家小朋友生日會既選擇多咗好多。弟弟試過去同學仔屋企、去indoor bouncy castle、室內攀石場、playhouse….仲有同學仔邀請佢一齊去睇一場hockey game當慶祝生日。
老婆問弟弟今年想唔想要一個生日會，弟弟諗咗一下，跟住話：「好呀」。
於是，老婆趁早排Black Friday有優惠，book咗一間有室內跳彈床既play house同弟弟攪生日會。平時入呢間play house玩兩個鐘要CAD40一個人，今次老婆買既Black Friday生日會package，十個人玩兩個鐘再加埋兩個pizza都係除返每人廿幾蚊加紙， 認真抵玩。
最正喺玩完有人幫你執手尾嘛。
我地提早15分鐘去到play house度check-in。弟弟朋友仔既家長陸續帶住小朋友入場，放低小朋友之後同我地寒暄幾句就離開，夠鐘先返黎pick up。呢個安排，似乎係呢度家長之間既默契，畢竟好難得先可以擺低個小朋友兩個鐘自己me time下。家長之間亦唔駛應酬對方，反正呢度喺唔興同其他家長傾「小朋友喺邊度補習呀？」
弟弟邀請咗學校幾個比較要好既朋友黎同佢慶祝生日。以前成日擔心弟弟喺新環境識唔到新朋友，但其實包括我同家姐在內，佢可能先係適應得最好、交到最多朋友既一個。
跳咗兩個鐘，到咗切蛋糕時間。弟弟既朋友仔坐喺弟弟身邊，一齊唱生日歌俾弟弟聽。弟弟既開心又難為情既表情可愛極了。
生日會話咁快就完結，弟弟朋友仔既父母逐一返黎pick up。
弟弟好似我地結婚擺完酒咁送客，逐一向朋友仔送上回禮禮物然後講再見。
弟弟喺每個回禮禮物袋上面畫上朋友仔鐘意既野：例如朋友A鐘意hockey，佢就畫咗支hockey stick俾佢。雖然弟弟一向粗枝大葉，但其實自有佢細心既一面。
比起弟弟今次生日會收到既一大堆禮物，我諗同一班朋友仔共渡生日既歡樂時光對佢黎講係更加珍貴。
唔知弟弟長大後會唔會記得呢一日呢？至少，我肯定我會記得。
