公司推出一個新工作計劃去吸引年輕人加入。計劃標榜「無需經驗」，希望幫助年輕人喺一個容許撞板既工作環境下發揮所長。
我地部門因此增添一位女新力軍。我叫佢做Alice。
Alice係意大利裔既加拿大人。佢有一雙藍眼睛、面尖尖加上好典型外國人既鷹鼻，成隻耳仔穿滿耳環，直金色頭髮長及肩膀。佢身型嬌小，不過俾我好動既印象。可能因為每星期有兩日都見佢拎住個健身袋。
Alice喺多倫多出世，大學畢業後打咗一陣工就離開多倫多黎咗Calgary。主要係因為佢想要有自己獨立既空間，但多倫多生活成本太貴，所以佢選擇搬黎物價較低既Calgary。
「喺多倫多，如果我想自己搬出黎住可能每個月要俾2500 – 3000蚊房租。喺Calgary我1600蚊就攪得掂，地方仲要大啲。我媽媽起初極力反對我自己一個人搬省，但佢最近黎探完我之後都話我間屋地方夠大位置又方便，放心咗好多。」
同多咗啲同事傾計，發現原來搬城巿或者搬省喺度應該係幾普遍。就以我條team為例，七個人無一個喺係Calgary長大，而Calgary亦唔係佢地第一個喺加拿大居住既城巿。
每個人搬省都有不同原因，例如好似Alice咁覺得自己居住地太貴係其一主因。Alice另一個搬黎Calgary既原因係因為佢鐘意喺度遊山玩水。
「我其實黎之前已經睇咗好耐附近有乜山可以行、有咩地方可以帶我隻狗去玩。Calgary有好多地方啱我同狗仔去玩呢！」好動既Alice越講越眉飛色舞。
好老實，我揀黎Calgary既原因其實最主要係因為我老婆喺度長大、有家人又有朋友喺度。我係無比較過Calgary同其他加拿大城巿有咩分別。所以聽人地講佢由其他地方搬黎既理由，反而俾咗啲新既角度我去了解呢個地方。
老細俾我既任務就係將我本身做緊既野過俾Alice，好等我可以分身做下其他野。
起初佢交俾我啲野都要改幾次先交得俾老細，總覺得呢個後生女好似無心裝載。不過慢慢地，佢開始越做越上手又越做越上心。特別係越讚得佢多，佢交俾我既野就越快又越好，而且開始更主動pick up更多工作上既責任。
我唔知道呢個係Alice獨有既性格，定係西方人普遍比較接受鼓勵多於責備。不過感覺用香港果種「唔鏟唔得」既方式似乎未必對呢度既年青人有效果。
既然呢度教育小朋友既方法都已經唔同，我諗自己喺工作上點應對其他人都要入鄉隨俗一下。
還好對我黎講，用英文講啲鼓勵說話總比用英文鏟人易得多。
「今日我講既呢位同事，係一位一次又一次超越我期望既同事。」
我好少喺成公司面前講野。今次算係破例吧。
「有一次，我只係打算叫佢黎join我個會，結果佢會後做咗成個recap再寫埋next steps俾我。
又有一次，我放完假返黎有樣ad hoc野忽然要我跟。正當我喺度懷疑人生既時候，佢同我講佢會幫我跟ad hoc單野，我catchup返自己啲野就好了。」
我講到呢度停咗一下，大家好好奇我到底講緊邊個。
「所以…呢個月既每月之星，佢係實至名歸。恭喜你！Alice！」
掌聲之下，Alice攞咗佢喺公司既第一次每月之星bonus。
Alice走埋黎同我講多謝，我答佢：「唔好多謝我，多謝你自己既努力。你係應得㗎！」
睇到呢位妹妹好開心既笑容，我都覺得好滿足。
除咗替佢開心之外，作為一個曾經好需要一個機會既人，到兩年幾後既今日終於可以俾一次機會其他人，都有少少百般滋味在心頭。
