「我黎加拿大/英國/澳洲/台灣….做咩」？
對於我地呢一輩移民既家長，我相信大家都會答「為咗小朋友」。
呢個看似好唔實際既問題，我覺得對我地呢一代選擇移民既家長，反而係一個切身既問題。
但我唔希望呢個係我最後既答案。因為我唔希望留俾子女既係「我為你犠牲咗好多」既包袱。我希望既係証實俾小朋友睇喺一個不同既地方，一家人依然可以獲得幸福。我可以活得跟你們一樣好。
黎咗加拿大一年有多，二零二一年，好幸運地俾我搵到一個新既安樂窩同一份新既工作。但當我尋找到生活所需、又睇見小朋友開始適應既同時，我
問自己「我黎加拿大做咩？」
好似喺香港咁再「向上爬」過嗎？
自從放棄咗香港份工黎呢度重新黎過，事業上由行咗一大段路忽然行返去起點，我難免有一點「我不想努力了」既消極。而且我心底裏覺得：如果我用返喺香港果時既「搵食」mindset，咁我點解要黎呢度？
不過當搵食唔再係唯一目標，我的確有啲迷失。無想過原來每日返工放工曾經係我唯一既意義。所以好老實講，對於呢個第二人生應該點走，我未有答案。
唔知咁算唔算係中年危機……?
我覺得其中一條出路，可能喺盡量去做一啲以前喺香港無做、唔會做既事，令自己變得更好。我知道有好多移咗民既人，有人變廚神、有人變超級技工乜都識整。我覺得我可以學、可以做、可以進步既仲有好多。
好似方東昇話齋：「世界上最大既空間，係進步空間」。
我相信二零二二年或者更遠既將來，我諗我仍然會不斷思索「我黎加拿大做咩」呢個問題。
呢個唔係「尋找他鄉的故事」，而係「黎到他鄉先黎尋找自我的故事」。當然，更大機會只係一個「他鄉尋找美食既故事」。
可能我仲需要尋找好耐先知我除咗搵食之外，到底想搵到乜野。
不過唔緊要。
因為我覺得黎到加拿大，我地一家人得到不一樣既禮物。
係「時間」同埋「可能性」。
