家姐由細到大都係好典型既三分鐘熱度。無論係彈琴、朗誦、乒乓波、羽毛球、跳舞……種種佢當初好有熱忱去學既野，無一樣可以做得耐。
作為家長，我一直對迫唔迫佢堅持學落去好糾結。
我係深信「勉強無幸福」論既人。我覺得要對一件事有熱情 (passion) 先會做得好同堅持得耐。因此我從來都唔想「迫」自己既子女去學啲佢無興趣既野，覺得佢試過、練過，唔鐘意咪move on囉。
但當睇住家姐既興趣好似走馬燈咁不斷轉換，我又不得不懷疑自己：「我係咪助長緊佢容易放棄既性格呢？」
老婆既理念係「樣樣野都要試下」。當家姐走返黎話要放棄學某樣野既時候，老婆就會同佢講：「請你用宜家多咗既時間去嘗試另一樣野」。
由香港黎到加拿大，老婆都keep住俾家姐有少少課外活動參與，例如游水班。不過佢對每件事既態度始終最多都係「不抗拒」，睇唔出佢好似弟弟咁對某件事有所追求。
所以我無諗過喺不知不覺間，竟然有一件事會令佢投入到欲罷不能。
呢件事就係寫作。
近呢一年，家姐一放學就開住部電腦不停咁寫野。起初我以為佢係喺度做功課，後來當佢分享佢既作品俾我地睇，我地先知道原來佢係喺度寫緊文章。
佢既文章由起初既一啲短文講下佢對某啲事物既認知同睇法，慢慢變成創作故事。故事由開頭簡單十個單元左右既故仔慢慢演變成動輒二、三萬字既小說。
家姐既小說既英文用字好多變化，唔係不停咁用「XX said」。好多字我基本上已經要查字典先睇得明。佢寫既人物對話好流暢，簡單對答加上語氣既描寫已經可以推展到個故事既情節。
喺我地成日抱怨家姐移民後啲中文急速變差既時候，事實上，佢既英文口語同書寫卻係以更快既速度超越我想像既水平。
老婆見家姐寫得起勁，於是鼓勵佢去參加寫作比賽。家姐起初有啲抗拒，不過最終俾我老婆說服。正如我以前都寫過，老婆就係有呢種說服人既力量。
由於比賽有字數限制，所以家姐反而要喺佢果啲成千上萬字既文章內節錄幾百字出去參賽。諗起自己細個交英文作文要絞盡腦汁七拼八湊先寫得出二、三百字，中間仲要加上大量標點符號去充字數 (最鐘意用省略號)，今日家姐竟然係要「撮寫」先可以交得出一篇七百字既文。
雖然唔知道點解家姐既寫作能力短短一兩年間突飛猛進，但我覺得同佢有大量既閱讀時間同機會比較大關係。家姐自小就已經鐘意睇書，黎到加拿大，因為無功課，老婆每星期借一大堆書返黎俾家姐睇。睇得多、吸收得多，家姐自然無論用字、故仔結構都有飛躍既提升。
所以每次有人話外國讀書無野學，我都不太同意。
外國既學校或者的確無香港教咁多野，但小朋友自主學習返黎既知識，往往力道先係更大、內容先係更深刻。至少我深信家姐今天既寫作能力，絕非每個星期英文默書同考grammer所能習得。
今日，信箱出現一封少有地寄俾家姐既信。
打開信件，大家都喜出望外 – 家姐篇文喺比賽度入咗圍，有機會喺十一月再競逐進一級既名次。今次入圍，出版社會收錄佢既作品同其他入圍文章入一本書度，最後出版社想當然就係叫你俾錢去買呢本書。
講真，我同老婆雖然都覺得呢個比賽都係想夾埋搵下家長錢。不過始終一睇到家姐「有奬攞」，心裡都會有作為家長既驕傲同虛榮。
細個讀中學既時候曾經僥倖地攞過一次徵文比賽既優異奬。當時對自己信心大增，令自己多咗好多動力寫作，仲幻想如果有一日自己既文字可以係書本上出現就好了。
估唔到家姐今年十歲就實現咗我當年呢個小小既願望。
不過，最令我開心既係終於睇到家姐有一樣野喺唔駛人叫、唔駛人提都會自動自覺去做、去改進。佢總算搵到佢既第一個passion。
宜家唯一既煩腦係：佢掛住寫野寫到廢寢忘餐，停都停唔住。以前驚佢無熱情，變成宜家又驚佢太過熱情。
做家長真係矛盾呢……
