如果同小朋友移民喺為咗更好既成長環境，咁我嚮往自己移民後能得到既，應該係「work life balance」。
但現實除咗work life balance，仲有銀行個account balance。我估計好多移民既人同我一樣，遇到收入銳減，睇住account balance下滑，個心理就開始唔係好balance。
俗語話「淡定有錢剩」。但作為一個典型香港人，我承認我係「有錢剩先會淡定」。
認識我既人應該知道我唔算係大洗既人，但喺外國生活既日常開支其實不少。扣除每個月既洗費，份糧都用得七七八八無乜錢剩。呢種「長期糧尾」既狀態令我覺得有啲不安 (以前有個朋友好鐘意話自己係日本人，個名叫長崎良美）。
所以黎到加拿大之後，除咗搵咗份長工，自己亦有做兼職。同啲同事傾閒計，發現不論係土生土長本地人定係新移民，原來大家都一樣有做兼職，亦唔覺得係啲咩秘密。
我諗喺加拿大呢度，兼職唔應該叫做「秘撈」，而係「明撈」。
有同事每星期有兩晚放咗工之後會去做hockey game既球証，遇著兩隊打架可能攪到十二點先返到屋企，第二朝又再返工。有同事幫人放狗、有人會自己整啲飾物去賣……喺發現大家原來都好多才多藝之餘，同時發現原來大家都有副業幫補下。
起初自己都balance到兩份工作，不過踏入2023年，因為正職開始4天返office再加上工作量大增，令自己原本喺移民後建立既work life balance慢慢失衡：
運動做少咗。
書睇少咗。
野學少咗。
當然，如果你有keep住睇呢個blog，應該會發現呢度都update少咗。
我喺果種只要個均衡被打破，就好難pick up返既人。個感覺就類似啲人原本日日keep住執屋，但有日忽然停咗，宜家攪到成屋垃圾唔知點入手果種迷失。
而且年紀大咗，一件事出咗局想要入返局就要付出更多既努力同時間，惡性循環地令你更加難重返軌道：開始想做返運動，但做幾下就週身痛；想再開始寫下野，但以前一星期可以寫兩篇，宜家寫來寫去都寫唔出。
或者從來最容易pick up既習慣，只有壞習慣吧。
踏入2024年，希望自己趁住年頭呢股衝勁可以喺加拿大尋找到一個更啱自己既節奏、一個新既balance。
忽然覺得啱啱呢句野好適合做某波鞋品牌既slogan……
