喺加拿大做咗兩年野，當中都經歷過幾次同事辭職另謀高就。呢個星期又有一位。
離職既係多倫多office一位年輕既華裔男同事，入黎做咗唔夠一年就成功畢業搵到下一處好路數。我叫佢做同事A吧。
因為地域上既差距，我地幾個同事決定同佢做一個網上farewell。我地成班人入咗Teams個chatroom，每人拎住杯野飲，輪流向同事A講出一番心底說話：
「記得當年project爆鑊，好彩有同事A力挽狂瀾。多謝你！」
「同事A，唔係你我都launch唔到project！多謝你！」
雖然個氣氛好溫馨，但唔知點解……我有少少覺得好似個同事大吉利是去咗，大家喺度一齊懷緬佢既生平咁。
同事A喺大家既一番感言下都有少少尷尬，結果唯有用官腔既口吻同大家講：「多謝大家。我真係學咗好多野呀」。
大家追問同事A係咪會放下假先返下一份工，同事A打趣地答：「我都想，但我仲要供mortgage呀。星期一即刻返第二份工喇」。
我對於呢個咁香港人既回答有啲意外。佢係爭在未答「搵食啫，我想㗎」。我開始懷疑佢係香港人既移二代。
網上farewell喺呢個時候開始變得有少少dry；因為要做既事感覺上已經做完，但就咁完又好odd。
我忽然覺得呢個farewell好似爭咗啲野。
係散水餅。
Last day食散水餅已經係香港一個根深蒂固既職場文化，甚至變成好似端午節食粽、中秋食月餅一樣既傳統。
我成日幻想冥冥之中，有一個散水之神，類似新年既財神咁。如果你last day無請人食散水餅，散水之神會懲罸你 – 散咗你啲水 (錢)。所以last day可以無HR、可以無hand over甚至可以無離職者本人，但唔可以無咗散水餅。
事實上，散水餅亦越來越講究。我記得自己初入行果時個門檻不過係美心西餅，宜家已經有啲餅店專做特色散水餅、甚至散水禮物。或者攪攪下，香港可以攪一個散水節 – 有唔同散水餅試食、仲有攤位遊戲玩掟雞蛋落老細個人像……分分鐘勁過泰國潑水節。
唔知會唔會有一日，散水餅呢個文化會黎到加拿大我工作既地方呢？
如果係….我應該揀咩做散水餅好呢？
感覺上Tim Hortons既donuts似乎最穩陣既選擇。我諗散水之神應該會同意吧。
